أنا الشاعر

داعمر الضحكه جوايا 

عددها ثوانى ودقايق

وباقى العمر متضايق

انا الشاعر مانيش شاعر

ولاحاسس ولافاكر

اخاف مره باحلامكم واوجاعكم

اكون كافر

انا بكتب كلام سافر

وعارف انى ادبي قليل

مانا شايف فعز النور 

بيطرح ليل

انا شايف ظلام كابس 

ومش شايف غير الاوساخ 

بيتعاركو على كرسي

وطن بيروح 

وكل نضالنا منفعشى

وكل قانون بحكم الثوره دى باطل

قانون محشى 

انا قلبى بيتحرك ويتكلم وانا بكتب 

مليش فى اللف والدوران 

انا انسان 

انا المصري 

بتاع الفول وجمبه العيش

انا عايش مع الدراويش

وميت مره بقول ليكم انا الغلبان

انا عمرى ماكنت جبان 

قانونك يالبعيد باطل

مع الثوره مفيش تنظيم

دى هيا الهوجه واللمه 

وبص وراك يالوح ياغشيم 

مشى قبلك تلاته نظام

فقوم للثوره وادى تمام

وفكك يالا من اوهام

وبكره الجاى ده لينا خلاص مش ليك

وبص علينا م الشبابيك

نعلم اهلك الثوره واحكامها

وتمشى تطاطى فى زمامها

ياحاكمنا  ياكوم عضم وخلاص خرفان 

خلاص انت مليت كرسيك

وبكره الشعب يملى ميدان 

انا الشاعر وانا المصرى وانا الغلبان